Բարսելոնայի գլխավոր մարզիչ Պեպ Գվարդիոլային դուր չի գալիս այն, թե ինչպես է ընկալվում Բարսա- Շախտյոր մրցավեճը հանդիպման նախաշեմին, և նա ցանկացել է զգուշացնել բոլորին: 


Տարօրինակ իրավիճակ է ստեղծվել: Ես անսովոր զգացողություններ ունեմ: Ինձ բոլորովին դուր չի գալիս այն փաստը, որ բոլորն այդ խաղն արդեն կատարված փաստ են համարում և վստահ են, որ մենք արդեն կիսաեզրափակչում ենք, - հայտարարել է Գվարդիոլան: 


Մարզիչը հայտարարել է, որ այդ վստահությունն ավելորդ է, ինչպես նաև զգուշացրել, որ հակառակորդը կարող է մեծ վտանգ ներկայացնել: 


Շարունակելով այդ միտքը` նա նախ խնդրել է երկրպագուներին մեծ ինքնանվիրումով մոտենալ այս հանդիպմանն ավելի, քան երբեք: Լավ կլիներ, եթե երկրպագուները գիտակցեին, որ սա Չեմպիոնների լիգան է և 1/4 եզրափակիչը: Եթե նրանք ցանկանում են, որպեսզի մենք հայտնվենք կիսաեզրափակչում և Լոնդոնում, ապա պետք է իմանան, որ առանց նրանց աջակցության մենք ոչնչի չենք հասնի: Ուկրաինայում մեզ լեփ-լեցուն մարզադաշտ է սպասվում: Նման լուրջ մրցաշարերում դժվար է հաջողության հասնել առանց հզոր աջակցության: Երբ Կամպ Նոուում տրիբունաներից մեզ աջակցում են հազարավոր ֆուտբոլասերներ, մենք մեզ շատ ուժեղ ենք զգում, - նշել է նա: 


Ես արդեն ասել եմ, որ նման մակարդակի խաղերում յուրաքանչյուր բացթողում կարող է ամեն ինչ բարդացնել: Շախտյորը շատ վտանգավոր թիմ է, որը գնալով զարգանում է: Նրանք աստիճամաբար բարելավում են իրենց խաղը:  


Շախտյորի մասին շատ քիչ է խոսվում, դիմակայության ելքն արդեն որոշված է համարվում, Չիգրինսկիին թերագնահատում են, ինչը շատ տգեղ է: Ինչպես կարելի է ասել, որ նա վատ է խաղում: Այդ թիմը բոլորովին վերջերս հաղթել է Եվրոպայի լիգան, նրա կազմում հանդես են գալիս հինգ բրազիլացիներ, որոնց ես կցանկանայի տեսնել Բարսելոնայում: Նրանց մարզիչը մարզում էր դեռ այն ժամանակ, երբ ես դեռ չէի էլ սկսել ֆուտբոլ խաղալ: Դա հզոր թիմ է: Նրանք հաղթել են Ռոմային: Նրանք մի շարք ուժեղ կողմեր ունեն: Նրանք միշտ լավ տպավորություն են գործել իմ վրա, իսկ հիմա` հատկապես, - ասել է Գվարդիոլան: 


Ինչ վերաբերում է Մեսսիին, Գվարդիոլան հայտարարել է, որ ռիսկի չի ենթարկի նրա առողջությունը, թեև կցանկանար տեսնել նրան թիմի կազմում. Մենք չենք ցանկանում կորցնել նրան, ինչպես և յուրաքանչյուր այլ ֆուտբոլիստի: Ես չեմ ուզում, որպեսզի որևէ մեկը վնասվածք ստանա, բայց եթե մենք կես ուժով խաղանք Շախտյորի դեմ, ապա կզիջենք նրանց, - ասել է մարզիչը: 


Այս հանդիպման արդյունքն առանցքային կլինի Բարսելոնայի համար, եթե Վիկտոր Վալդեսը անառիկ պահի դարպասը: Պեպն այս առիթով ասել է. Երբ խաղում ես սեփական հարկի տակ, կարևոր է բաց չթողնել, բայց մենք այժմ այն մակարդակի թիմերի հետ ենք մրցում, որոնք կարող են գրավել մեր դարպասը: 


Եվ եզրափակել է Գվարդիոլան հետևյալ արտահայտությամբ. Ինձ մոտ զգացողություն կա, որ մենք համարվում ենք Եվրոպայի լավագույն թիմերից մեկը, բայց խաղերը պետք է հաղթել, այլ ոչ թե հաղթած համարել:

armsport.am