Իսպանիայի հավաքականի ֆուտբոլիստ Անդրես Ինյեստան քննադատել է Լիտվայի խաղադաշտը, որտեղ իսպանացիները Եվրո-2012-ի ընտրական փուլում հանդիպում պետք է անցկացնեն այդ երկրի հավաքականի հետ: Այս մասին գրում է championat.ru-ն' ըստ «Marca»-ի հրապարակման: Ֆուտբոլիստի խոսքերով, նման խաղադաշտում դժվար կլինի դիտարժան ֆուտբոլ ցուցադրել:
«Լիտվայի խաղադաշտն ինձ հիշեցնում է այն խաղադաշտերը, որտեղ ես մանկության և պատանեկության տարիներին ֆուտբոլ եմ խաղացել: Անկասկած, նման խաղադաշտը կդժվարեցնի հանդիպումը: Այդ պատճառով մենք առավելագույնս կենտրոնացված պետք է խաղանք, որպեսզի անկանխատեսելի հետևանքներ չլինեն: Եթե մեզ ասում են, որ մենք պետք է խաղանք այդ խաղադաշտում, ուրեմն մենք պետք է դա անենք: Խնդիրն այն է, որ նման որոշումներ ընդունում են ոչ թե ֆուտբոլիստները, այլ ՈՒԵՖԱ-ի պաշտոնյաները»,-ասել է Ինյեստան:
