Առաջին հանդիպման արդյունքը այս զույգերի դիմակայությունում ոչինչ չի փոխել: Չնայած Բարսելոնայում գրանցված ոչ-ոքի արդյունքին, կատալոնական ակումբը, ով այսպիսի հանդիպումների մեծ փորձ ունի, համարվում է հանդիպման ֆավորիտը:
Պատասխան հանդիպման ժամանակ ևս շատ մեծ նշանակություն ունի «Ատլետիկոյի» հարձակման առաջատար Դիեգո Կոստայիմասնակցությունը: Մեկ շաբաթ առաջ կայացած խաղում Կոստան խաղադաշտ դուրս եկավ թիմի մեկնարկային կազմում, բայց փոխարինվեց առաջին իսկ խաղակեսի ընթացքում: Մադրիդյան ակումբի գլխավոր մարզիչ Դիեգո Սիմեոնեն շատ կցանկանար, որպեսզի թիմի գլխավոր ռմբարկուն մասնակցեր այս հանդիպմանը, բայց ամենայն հավանականությամբ, արգենտինացի մասնագետը այդպիսի ռիսկի չի դիմի: Իսկ թիմի մեկնարկային կազմի մեկ այլ ֆուտբոլիստ` Արդա Թուրանը չի մասնակցի Մադրիդում կայանալիք պատասխան հանդիպմանը:
Իսպանիայի մայրաքաղաքում կայացած մամլո ասուլիսի ժամանակ Դիեգո Սիմեոնեն իբր բացել է խաղաքարտերը, ասելով, որ Կոստայի փոխարեն հանդիպման առաջին իսկ րոպեներից խաղադաշտ դուրս կգա Ադրիանը, ով կարող է Դավիդ Վիլյայի հետ դուետ կազմել: Այդ դեպքում որակազրկումից վերադարձած Ռաուլ Գարսիան կա՛մ կմնա պահեստայինների նստարանին, կա՛մ էլ Սիմեոնեն նրան կհրահանգի խաղալ եզրերում:
Եթե մադրիդյան ակումբի կազմում որոշակի խնդիրներ կան, ապա նույնը վերաբերում է նաև «կապտանռնագույններին», ովքեր հատկապես պաշտպանության կենտրոնում լուրջ խնդիրներ ունեն, քանի որ շարքից դուրս է մնացել թիմի հիմնական կենտրոնական պաշտպան Խերարդ Պիկեն: Եթե «Ատլետիկոյի» հարձակման գծում որոշակի հարցեր բաց են մնում, ապա «Բարսայի» պաշտպանության կենտրոնում եռանկյունի կկազմեն Պինտոն, Մասկերանոն և Բարտրան: Թիմի դարպասապահ Պինտոյին, ով փոխարինում է վնասվածք ստացած Վիկտոր Վալդեսին, նորեկ չես համարի, իսկ Բարտրային, ով դեռ նմանօրինակ հանդիպումների մեծ փորձ չունի, մասնագետների կարծիքով դեռ չի կարող լիարժեք փոխարինել Պիկեին:
«Բարսելոնան» պետք է շեշտը դնի իր հարձակման գծի առաջատարների վրա, քանի որ նրանք բոլորը լավ մարզավիճակում են, իսկ թիմի գլխավոր մարզիչ Խերարդո Մարտինոն ընտրության լավ հնարավորություն ունի: Դեռ պարզ չէ, թե մեկնարկային կազմում այս եռյակից` Սանչես, Պեդրո, Ֆաբրեգաս, ով հանդես կգա, դա կախված է` ինչ մարտավարությամբ կատալոնացիները հանդես կգան:
Թիմերի մոտավոր կազմերը.
«Ատլետիկո» Մադրիդ.
Կուրտուա - Ֆելիպե Լուիս, Գոդին, Միրանդա, Խուանֆրան - Կոկե, Գաբի, Տիագու, Ռաուլ Գարսիա - Վիլյա, Ադրիան
«Բարսելոնա».
Պինտո - Ալբա, Բարտրա, Մասկերանո, Դանի Ալվեշ - Բուսկետս, Խավի, Ինիեստա - Նեյմար, Մեսսի, Սանչես
Վնասվածքներ ունեն.
«Ատլետիկո» Մադրիդ
Դիեգո Կոստա (հարցական է), Մանկիլյո, Թուրան
«Բարսելոնա»
Վալդես, Պիկե, Կուենկա
Որակազրկվածներ
չկան
Նախախաղային մամլո ասուլիս
Դիեգո Սիմեոնե («Ատլետիկոյի» գլխավոր մարզիչ)
- Առաջին հանդիպման արդյունքը ոչինչ չի նշանակում: «Բարսելոնան» միշտ փորձում է գրոհելով հաջողության հասնել, իսկ դրա համար հնարավոր է 120 րոպե պետք լինի: Ոչ վաղ անցյալում կատալոնացիները «Սանտյագո Բեռնաբեուում» դարձել են 4 գոլի հեղինակ, չեմ կարծում, որ մարզադաշտի գործոնը նրանց վրա ինչ-որ լուրջ ճնշում կլինի: Նրանք այդպիսի հանդիպումների մեծ փորձ ունեն:
Խերարդո Մարտինո («Բարսելոնայի» գլխավոր մարզիչ)
- Չեմ սիրում կանխագուշակումներ անել: Մենք պետք է «Ատլետիկոյից» լավ խաղանք ու հաղթենք: Երկու թիմերն էլ միմյանց լավ են ճանաչում: Թիմերը լիովին տարբեր խաղաոճեր են դավանում: Ես միայն մեկ բան գիտեմ, որ այս մրցաշրջանում «Բարսելոնան» դեռ ոչ մի խաղում չի կարողացել հաղթել «Ատլետիկոյին»: Տեսնենք` այս անգամ ինչպես կլինի:
Աղբյուրը` ArmFootball.com / Գևորգ Մարտիրոսյան
|