Նեյմարի, Ինյեստայի, Վալդեսի ու Ալբայի հետխաղյա հարցազրույցները - 2 Սեպտեմբերի 2013 - ArmBarca.com
Գլխավոր էջ » 2013 » Սեպտեմբեր » 2 » Նեյմարի, Ինյեստայի, Վալդեսի ու Ալբայի հետխաղյա հարցազրույցները
13:59
Նեյմարի, Ինյեստայի, Վալդեսի ու Ալբայի հետխաղյա հարցազրույցները
Իսպանիայի առաջնության 3-րդ տուրի`«Վալենսիայի» հետ մրցավեճում 3-2 հաշվով տոնած հաղթանակից հետո ԶԼՄ ներկայացուցիչների հետ են շփվել «Բարսելոնայի» ֆուտբոլիստներից մի քանիսը:

Վիկտոր Վալդես. «Անձամբ ես գոհ եմ մրցաշրջանի սկզբում իմ ցուցադրած խաղից: Եթե դու օգնում ես թիմին հաղթանակ տանել, ապա միշտ էլ քեզ լավ ես զգում:

Մենք հաղթեցինք շատ կարևոր մրցավեճում, որպեսզի շարունակենք տիտղոսի համար պայքարը: Այս երեք միավորները շատ գոհացնող են, քանի որ խաղում էինք ծանր մրցակցի հետ, ու երբ 3-0 հաշվից հետո բաց թողեցինք երկու գնդակ, ամեն ինչ ավելի բարդացավ»:

Նեյմար. «Մեր ճնշումը մրցակցի վրա մի փոքր թուլացավ առաջին խաղակեսի վերջնամասում, ինչի արդյունքում երկու գնդակ բաց թողեցինք: Մենք կբարելավենք մեր խաղն առաջիկա հանդիպումներում: Վալենսիացիները հիանալի խաղացին երկրորդ խաղակեսում, ու նրանց դիմակայելը մեզ համար դժվար էր: Ֆիզիկական տեսանկյունից ինձ գնալով ավելի լավ եմ զգում, բայց ես պետք է խաղ առ խաղ ավելի լավ հանդես գամ: Վստահ եմ, որ ամբողջ թիմը ամբողջ մրցաշրջանի ընթացքում կառաջադիմի ֆիզիկական ու մարտավարական տեսանկյունից»:

Ժորդի Ալբա. «Մենք արդեն խաղացել ենք երեք ուժեղ թիմերի հետ («Մալագա», «Ատլետիկո» ու «Վալենսիա»), նրանց բոլորին էլ դժվար էր հաղթել, բայց մրցաշրջանը դեռ նոր է սկսվում, ու խաղը բարելավելու ժամանակ կա: Այնպես որ, ամեն ինչ նորմալ է` հաշվի առնելով մրցաշրջանի նման բարդ սկիզբը: Նոր մարզչի օրոք ես կատարում եմ գրեթե նույն գործառույթները, ինչ նախկինում: Երկրորդ խաղակեսում սկսեցի ավելի շատ մասնակցել հարձակվողական գործողություններին, ու ինձ հիանալի էի զգում, ինչը ոչ ամեն խաղում է լինում: Սակայն, ես միշտ պետք է հասցնեմ ճիշտ պահին վերադառնալ պաշտպանություն»:

Անդրես Ինյեստա. «Լիովին տրամաբանական է ամբողջ մրցաշրջանի ընթացքում ակտիվ ռոտացիա կիրառելը: Դա մարզչի որոշումն է: Գլխավորը, որ ֆուտբոլիստներից յուրաքանչյուրը պատրաստ լինի ամեն պահի դուրս գալ խաղադաշտ, երբ թիմն իր կարիքն ունի»:
Կատեգորիա: Մամուլի ասուլիսներ և հարցազրույցներ | Դիտումներ: 396 | Ավելացրեց: Արման1996