Չավի. «Ես երջանիկ եմ և ցանկանում եմ մնալ «Բարսելոնայում»»
Կատալոնական «Բարսելոնայի» կիսապաշտպան Չավի Հերնանդեսը El Mundo Deportivo-ի հետ զրույցում խոսել է Տիտո Վիլանովայի, առաջնության և «Ռեալ Մադրիդի» մասին:
«Շատ լավ մարզավիճակում ենք գտնվում: Ուրախ ենք, որ այսպիսի մեկնարկ ենք ունեցել: Հետաքրքիր է, որ «Ատլետիկո Մադրիդը» հավասար պայքար է մղել առաջնությունում: Հոգեբանական առավելություն ունենք Մադրիդի «Ռեալի» նկատմամբ: Ճիշտ է, դեռ առաջնության սկիզբն է, սակայն այսպիսի մեկնարկն իր գործն անում է:
Տիտոն թիմում շատ քիչ բան է փոխել: Արդեն չորս տարի է, ինչ փայլուն խաղ ենք ցուցադրում: Այժմ մեզ համար ավելի բարդ է, քան չորս տարի առաջ: Ամեն անգամ ցանկանում ենք բարելավել մեր խաղը: Տիտոն և Պեպը տարբեր են միայն ֆիզիկապես: Փիլիսոփայությամբ նրանք շատ նման են:
Ցավոք, մենք հիանալի հնարավորություն բաց թողեցինք «Ռեալից» 11 միավորով առաջ անցնելու համար: Սակայն ութ միավորն էլ վատ չէ:
Մեսսին փայլուն ֆուտբոլ է ցուցադրում: Նա տարեց տարի բարելավում է իր խաղը և առաջընթաց գրանցում: Լավ է, որ «Ոսկե գնդակը» բաժին հասավ նրան, սակայն Իկերը և Ինիեստան նույնպես արժանի էին այդ մրցանակին»,- նշել է Չավին: