Կատալոնական «Բարսելոնայի» գլխավոր մարզիչ Տիտո Վիլանովան մեկնաբանել է Չեմպիոնների լիգայի խմբային փուլի 2-րդ տուրում «Բենֆիկայի» նկատմամբ տոնած հաղթանակը :
«Հաղթանակը մեզանից բավականաչափ ուժեր խլեց, սակայն մենք Պորտուգալիայից կարևոր երեք միավորով ենք վերադառնում: Ես գոհ եմ այս արդյունքից: Վաղուց մեզ չէր հաջողվել հաղթել «Բենֆիկային» իր իսկ հարկի տակ, թեև «Բարսելոնան» այստեղ միշտ ուժեղ կազմով է խաղացել:
Առաջին խաղակեսում մրցակիցը շանսեր էր փնտրում հակագրոհների ժամանակ ու մեծ ճնշում էր գործադրում, ինչը մեզ խաբսեր անելու տարածություն էր տալիս: Իհարկե, արագ գոլը միշտ օգնում է, բայց ընդհանուր առմամբ այս հանդիպումը մեզ համար դժվար դասավորվեց:
Ալեքսիս Սանչեսը հերթական անգամ ապացուցեց, որ առաջընթաց է գրանցում: Մրցաշրջանի սկզբում նկատելի առաջընթաց տեսանք Ֆաբրեգասի խաղում, իսկ հիմա նույնը Սանչեսի դեպքում է:»,-ասել է Վիլանովան:
«Բարսելոնայի» գլխավոր մարզիչը խոսել է նաև թիմի ավագ Կարլես Պույոլի մասին, ով «Բենֆիկայի» դեմ խաղի ժամանակ ծանր վնասվածք ստացավ:
Ընթացիկ մրցաշրջանում Կարլես Պույոլն արդեն երկրորդ ծանր վնասվածքն է ստանում: Նախ` այտոսկրի կոտրվածք, իսկ հիմա էլ արմունկն է դուրս ընկել: Կենտրոնական պաշտպանների հետ մենք միշտ խնդիրներ ունենք, այդ պատճառով տվյալ դիրքում հաճախ այլ դիրքի խաղացողներ են հայտնվում:
Իսկ ինչ վերաբերում է «Ռեալին», անկասկած մեզ բարդ խաղ է սպասվում: Հիմա մենք պետք է հավաքենք մեր ուժերը երկու բարդ խաղերից հետո ու սկսենք պատրաստվել հանգստյան օրերին կայանալիք կլասիկոյին»,-եզրափակել է Վիլանովան:
