Հայաստանի ֆուտբոլի ազգային հավաքականի դարպասապահ Ռոման Բերեզովսկին PanARMENIAN.Net ի թղթակցի հետ զրույցում ասաց, որ այսօրվա հավաքականը տարբերվում է նախորդներից: «Նախկինում մեր թիմը ավելի պաշտպանողական ֆուտբոլ էր ցույց տալիս, իսկ այժմ մենք մեծ ուշադրություն ենք դարձնում հարձակմանը, ինչի շնորհիվ էլ կարողացել ենք Եվրոպայի առաջնության ընտրական փուլում 22 գոլ խփել: Մենք խաղում էինք միայն հաղթանակի համար, դա էր նաև պատճառը, որ քիչ գոլեր բաց թողեցինք: 22 խփած գոլի դիմաց մենք բաց ենք թողել 10-ը՝ ինձ թվում է, սա վատ արդյունք չէ»,-ասել է Բերեզովսկին: Դարպասապահը գերազանց է գնահատում հայ ֆուտբոլիստների խաղը ԵԱ-2012 ընտրական փուլում, քանի որ հավաքականը լավ արդյունքների հասավ և 3-րդ տեղը զբաղեցրեց B խմբում՝ իր կազմում ունենալով բազմաթիվ երիտասարդ խաղացողների: «Վերջին 6-7 տարում մեծ աշխատանք է տարվել, ինչը և օգնել է հասնել նման արդյունքի: Կարծում եմ, մեր հավաքականը նման է «Բարսելոնային», բայց ոչ թե ոճով, այլ մոտեցմամբ »,-ասել է նա: ԵԱ ընտրական փուլի Իռլանդիայի հետ վերջին խաղում մրցավար Իտուռալդո Գոնսալեսը կարմիր քարտ ցույց տվեց Բերեզովսկուն, որից հետո էլ Հայաստանի հավաքականը երկու գոլ ընդունեց սեփական դարպասը: Ըստ Բերեզովսկու, այդ խաղից արդեն բավական ժամանակ է անցել, և ինքը հասցրել է վերլուծել խաղը: «Հատկապես այժմ, երբ ես հայրենիքում եմ, ինձ ավելի հանգիստ եմ զգում: Ինձ ուրախացնում է այն, որ և ֆուտբոլի մասնագետները, և երկրպագուները նշում են Իռլանդիայի դեմ խաղում և ողջ ընտրական խաղաշրջանում մեր լավ խաղը»,-ասել է Հայաստանի հավաքականի դարպասապահը: Բերեզովսկին, որը հավաքականի կազմում անցկացրած խաղերի քանակով (67) երրորդն է, գտնում է, որ ԱԱ-2014 ընտրական փուլում նրանք կցուցադրեն հաղթական խաղեր կ և լավագույնս կդրսևորեն իրենց:
PanARMENIAN.Net
|