«Շախտյորի» ավագ Դարիո Սռնան իր կարծիքն է հայտնել Չեմպիոնների լիգայի քառորդ եզրափակչի վիճակահանության մասին:
«Կխաղանք մինչև վերջին րոպեն, մինչև վերջին վայրկյանը: Իհարկե մենք ֆավորիտ չենք այս զույգում, բայց կաշխատենք մեծ անակնկալ մատուցել, թեև դա շատ դժվար կլինի»:
-Այն, որ առաջին խաղը «Կամպ Նոու»-ում է լինելու, դա առավելությո՞ւն է «Շախտյորի» համար:
-Տարբերություն չկա, առաջին խաղը կլինի սեփական հարկի տակ, թե' մրցակցի մոտ:
-Ո՞րն էր առաջին միտքը, երբ հայտնի դարձավ, որ մրցակիցը «Բարսան» է լինելու:
-Չգիտեմ, արդեն քանի անգամ «Բարսելոնայի» հետ խաղացել ենք: Լավ թիմ է, աշխարհի ուժեղագույն թիմերից մեկը: Առայժմ ոչ մեկը չի կարող համեմատվել «Բարսելոնայի» հետ: Ամենաբարդ մրցակիցը մեզ բաժին հասավ, և բավական դժվար կլինի առաջ շարժվելը:
-Մասնագետների կողմից արդեն կարծիքներ են հնչեցվել, որ դա պարզապես սպանություն կլինի...
-Սպանություն չի լինի (ծիծաղում է): Ամբողջ ուժերը կներդնենք և կաշխատենք լավ արդյունքի հասնել: Մենք վստահ ենք և Բարսելոնա ենք գնալու չպարտվելու տրամադրվածությամբ: Բայց, կրկնում եմ, աշխարհի լավագույն թիմի հետ դժվար կլինի խաղալ: Ֆուտբոլը ֆուտբոլ է մնում:
-Ամեն խաղ նոր փորձ է: Ի՞նչ փորձ կարելի է ձեռք բերել «Բարսելոնայի» հետ նոր հանդիպումից:
-«Շախտյորն» արդեն մեծ փորձ ստացել է: «Կամպ Նոու»-ում քառորդ եզրափակչում խաղալ «Բարսելոանյի» հետ իհարկե մեծ փորձ և մեծ բավականություն է: Իսպանիա ենք մեկնելու առանց ճնշվածության, գնալու ենք ֆուտբոլ խաղալու: Մարզադաշտում, կարծում եմ, որ մոտ 100 հազար մարդ կլինի, դա յուրաքանչյուր ֆուտբոլիստի համար երազի պես բան է: Ֆուտբոլ կխաղանք և չենք ընկճվի, (ծիծաղում է):
|