Կատալոնիայում, երեկ, կայացավ Չեմպիոնների լիգայի 1/8 եզրափակչի՝ Բարսելոնա-Արսենալ պատասխան հանդիպումը: Նախորդ խաղում, Լոնդոնում, Բարսելոնան պարտություն էր կրել 2-1 հաշվով, սակայն կարողացավ լավագույնս օգտագործել սեփական հարկի ընձեռած առավելութունը և 3-1 հաշվով հաղթանակի հասավ Արսենալի նկատմամբ:

Առաջին գոլը ծնվեց խաղակեսի ավարտից քիչ առաջ. աչքի ընկավ Մեսսին: Երկրորդ կեսում, անհավատալի ինքնագոլի հեղինակ դարձավ Բուսկետսը, ով Նասրիի կատարած անկյունային հարվածի ժամանակ արեց այն, ինչ չէին կարողանում անել Արսենալի ֆուտբոլիստները: Հաշվի հավասարությունը միանգամայն ձեռնտու էր Արսենալին, սակայն պատահեց մի բան, ինչի մասին արդեն շատ է խոսվել և շատ էլ դեռ կխոսվի: Հանդիպման 56-րդ րոպեին, Արսենալի հոլանդացի հարձավող Ռոբին վան Պերսին, սուլիչից հետո կատարած հարվածից համար ստացավ երկրորդ դեղին քարտն ու հեռացվեց խաղադաշտից (առաջին դեղինը նա ստացել էր Ալվեշին հարվածելու համար): Օրենքի տառին եթե նայենք՝ շվեյցարացի մրցավար Բուզական իրավունք ուներ, սակայն Վան Պերսին էլ իր հերթին փորձում էր արդարանալ, որ 95 000 հանդիսականների ձայների մեջ չի լսել սուլիչի ձայնը:

Այդ դեպքից հետո էլ ավելի բարդացավ առանց այն էլ միայն պաշտպանությունում գործող Արսենալի գործերը: Հանդիպման հաշիվը կարող էր էլ ավելի խոշոր լիներ, եթե իր բարձրության վրա չգտնվեր Ալումնիան. նա մի քանի անգամ հրաշքով անառիկ պահեց իր դարպասը: Այնուամենայնիվ, Բարսելոնան ևս երկու անգամ գրավեց Արսենալի դարպասը. աչքի ընկան Խավին և կրկին Մեսսին (11 մ.)՝ ձևավորելով հանդիպման վերջնական՝ 3-1 հաշիվը:

Շատերը կարող են ասել, թե Վան Պերսիի հեռացումն անարդար էր, որն ազդեց հանդիպման վերջնական արդյունքի վրա, սակայն չպետք է մոռանալ մեկ կարևոր փաստ՝ Արսենալը ողջ հանդիպման ընթացքում այդպես էլ գոնե մեկ անգամ հարված չկատարեց դարպասին, ինչը շատ բանի մասին է խոսում: Տեղին է հիշել, օրեր առաջ, Սամիր Նասրիի խոսքերը, թե  մենք Ինտերը չենք, որ խաղանք միայն պաշտպանությունում:

Հարկ է նշել մեկ փաստ ևս. աշխարհի վերջին երկու տարիների լավագույն ֆուտբոլիստ Լիոնել Մեսսին, ով երեկվա խաղում երկու անգամ գրավեց Արսենալի դարպասը, ընթացիկ մրցաշրջանում, ընդհանուր առմամբ, խփած գոլերի քանակը հասցրեց 45-ի: Նրա անձնական ռեկորդը, ողջ մրցաշրջանի համար, 47 գնդակն է, որն արձանագրել է անցյալ տարի: