«Բարսելոնայի» գլխավոր մարզիչ Խոսեպ Գվարդիոլան Չեմպիոնների լիգայի 1/8-րդ եզրափակչի «Արսենալի» հետ պատասխան խաղից առաջ խոսել է լոնդոնյան ակումբի և հավաքականի ծագող աստղ Ջեկ Ուլշերի մասին, որին անվանել է երկրորդ կարգի խաղացող, և եթե նա հայտնվեր կատալոնացիների կազմում, ապա նա կմնար պահետայինների նստարանին, հայտնում է "ukfootball.ru" -ն:
19-ամյա Ուիլշերը մեծ ներդրում ունի երկու շաբաթ առաջ «Բարսելոնայի» նկատմամբ տարած հաղթանակում, սակայն նրա խաղը, ինչպես երևում է, չի տպավորել Գվարդիոլային:
«Նա կարող է հիանալի ֆուտբոլիստ դառնալ «Արսենալի» և Անգլիայի հավաքականի համար, բայց մեր երկրորդ թիմում նրա նման խաղացողները շատ են, - ասել է Գվարդիոլան երեկ կայացած մամուլի ասուլիսի ժամանակ: - Նրա բախտը բերել է, որ «Արսենալը» ժամանակ ունի: Նրանց չեն ճնշում, որպեսզի ինչքան հնարավոր է շուտ նվաճեն տիտղոսներ: Նրա նման ֆուտբոլիստները խաղում են մեր երկրորդ թիմում»:
Գվարդիոլայի այդպիսի հայտարարությունից ապշած Արսեն Վենգերը հիշեցրել է նրան, որ նա դեռ նոր է սկսել աշխատել այս ոլորտում:
«Ես դաշտ եմ դուրս բերում Ջեկին, քանի որ նա արժանի է դրան, ես ինքս շատ վաղուց եմ այս գործում, որպեսզի հասկանամ, երբ է խաղացողը արժանի դաշտ դուրս գալու, ասել է «Արսենալի» գլխավոր մարզիչը: - Եվ Անգլիայում բոլորն էլ գիտեն, որ ես շատ մեծ ճնշման տակ եմ գտնվում»:
Գվարդիոլան չի մոռացել խոսել նաև «Արսենալի» 27-ամյա հոլանդացի հարձակվող Ռոբին վան Պերսիի հանդիպման անակնկալ հայտավորման մասին, որը, ինչպես ենթադրվում էր, պետք է բաց թողներ «Բարսելոնայի» հետ պատասխան հանդիպումը:
«Պարոն Վենգերն ասել էր, որ վան Պերսին չի խաղալու, իսկ այսօր նա թիմում է: Նմանատիպ ինչ-որ բան կատարվել էր նաև անցյալ տարի, այնպես որ, միգուցե, «Արսենալը» արդեն մասնավոր ինքնաթիռ է ուղարկել Տեո Ուոլկոտի ետևից», - ասել է կատալոնացիների գլխավոր մարզիչը:
«Նա իսկապես շատ շուտ ապաքինվեց, - առարկել է Վենգերը: - Սա մտքի խաղ չէ, որոնցում ես շատ թույլ եմ: Տեսնենք, թե ինչ կասեն երեքշաբթի մեր բժիշկները: Ես կցանկանայի, որ նա խաղար, բայց դրա համար նա պետք է 100%-ով, կամ էլ 99,5%-ով պատրաստ լինի»:
«Մենք չենք պատրաստվում վտանգել ոչ վան Պերսիի, ոչ էլ Ֆաբրեգասի առողջությունները: Կամ նրանք լիովին պատրաստ են, կամ էլ նրանք չեն խաղալու ընդհանրապես»:
Սակայն, Գվարդիոլան խոսել է նաև մրցակցի դրական կողմերի մասին, մասնավորապես նշել է, որ «Արսենալը» դեռևս չի նվաճել տիտղոսներ, բայց արդեն երկար տարիներ էլ խաղում է բարձր մակարդակի վրա:
«Ես լսել եմ «Արսենալի» խաղացողների հոգեբանական խնդիրների մասին, բայց ես համամիտ չեմ դրա հետ, - ավելացրել է Գվարդիոլան: - Թիմը պայքարում է Պրեմիեր լիգայի տիտղոսի համար, հասել են մինչև Լիգայի գավաթի եզրափակիչ, իսկ մի քանի տարի առաջ էլ խաղում էին Չեմպիոնների լիգայի եզրափակչում»:
«Արսենալը» միշտ էլ առաջատարների թվում է գտնվել, իսկ երբ դու ամեն մրցաշրջան գտնվում ես վերևում, դա խոսում է որակյալ թիմի մասին: Նրանք ժամանակ առ ժամանակ վաճառում են խաղացողներին, սակայն նրանց խաղամակարդակը մնում է նույնը: Շատ թիմեր դուրս են գալիս առաջին հորիզոնականներ մեկ տարով, որից հետո ամեն ինչ ավարտվում է, իսկ «Արսենալը» դա անում է ամեն մրցաշրջան»:
«Այո, նրանց ինչ-որ բան պակասում է, բայց նրանք երիտասարդ թիմ են, և երբ նրանք ինչ-որ բան նվաճեն առաջի անգամ, կհասկանան, որ իսկապես լավ թիմ են»: