Գլխավոր էջ » 2010 » Հուլիս » 25 » Դժվար է հաղթել մի մրցաշարում, որտեղ հանդես է գալիս «Բարսելոնան»,- հայտարարել է Ժոզե Մոուրինյոն
02:48
Դժվար է հաղթել մի մրցաշարում, որտեղ հանդես է գալիս «Բարսելոնան»,- հայտարարել է Ժոզե Մոուրինյոն
Ֆուտբոլի Իսպանիայի առաջնությունը համաշխարհային դասակարգման աղյուսակում ներկա պահին համարվում է լավագույն առաջնությունը:Իսպանական 2 գրանդ-ակումբների` «Բարսելոնայի» ու «Ռեալի» մասնակցությամբ հանդիպումների նկատմամբ հետաքրքրությունն ակնհայտ մեծ է բոլոր այլ թիմերի խաղերից :
Իսկ Հայաստանում Իսպանիայի առաջնության նկատմամբ հետաքրքրությունը, կարծում եմ, գերազանցում է անգամ անգլիականին: «Բարսելոնան» ու Մադրիդի «Ռեալը» Հայաստանում ունեն ֆաների այնպիսի մեծաթիվ ու նվիրված խմբեր, որոնց կնախանձեր հայկական ցանկացած թիմ: Անգամ այս թիմերին նվիրված հայալեզու կայքեր են գործում մեր երկրում, որտեղ ամենամանրամասն տեղեկություններ են ներկայացվում ակումբներում տիրող իրավիճակի, ֆուտբոլիստների մասին:
Մեր երկրում «Բարսելոնայի» ու «Ռեալի» ֆաները նման են աշխարհում գոյություն ունեցող միլիոնավոր նմանատիպ ֆաների, բայց նրանք նաեւ մի կարեւոր հանգամանքի պատճառով էականորեն տարբերվում են այլ թիմերի ֆաներից: «Ռեալի» իսկական ֆանը ոչ միայն մադրիդցիների համակիրն է, այլ նաեւ «Բարսելոնայի» ոխերիմ թշնամին ու` հակառակը: Այս հանգամանքը որոշակի իմաստով կրկնապատկում է իսպանական 2 գրանդների նկատմամբ հետաքրքրություն ցուցաբերող մարդկանց քանակը` մի մասը համակրում է, մյուսը` ատում: Համաշխարհային ֆուտբոլի ամենապայծառ աստղերի ներկայությունը, գեղեցիկ ու դիտարժան ֆուտբոլը Իսպանիայի առաջնությունը դարձնում են անկրկնելի:
Օգոստոսի 28-ին մեկնարկող հերթական առաջնությանը, օրինակ, մասնակցելու են աշխարհի ու Եվրոպայի վերջին տարիների բոլոր լավագույն ֆուտբոլիստները, ՀԱՀ-ում ավարտված Աշխարհի առաջնությունում չեմպիոնի կոչումը նվաճած 23 իսպանացի ֆուտբոլիստներից 20-ը, աշխարհի ամենաթանկարժեք 5 ֆուտբոլիստները: «Բարսելոնայի» ու Մադրիդի «Ռեալի» կազմում խաղացող ֆուտբոլիստների ընդհանուր արժեքը, ըստ գերմանական հեղինակավոր «Transfermarkt» գործակալության տվյալների, գերազանցում է 1 միլիարդ եվրոն` ուղղակի ապշեցուցիչ ցուցանիշ ֆուտբոլային ակումբների համար: Ահա սա է իսպանական ակումբային ֆուտբոլը, բայց ինչպես նկատեցիք, խոսքը միայն «Բարսելոնայի» ու «Ռեալի» մասին է: Իսկ, ահա, իսպանական մյուս ակումբները ֆուտբոլային համարյա բոլոր գործոններով տարեցտարի ավելի են հետ մնում այս 2-ից: Իսպանիայի առաջնությունը վերածվում է 2 թիմերի պայքարի, որոնք սակայն, իրենց մեծությամբ ու մասսայականությամբ կարողանում են իսպանական առաջնության նկատմամբ հետաքրքրությունը բարձրացնել: Պարզ է, որ բացառություն չի կազմելու նաեւ առաջիկա մրցաշրջանը, որն, ի դեպ, ինչպես եւ անցյալ տարի` ցուցադրվելու է «ՀԱՅTV» հեռուստաընկերության կողմից: Ֆուտբոլասերներին կրկին սպասվում է «Բարսելոնա»-«Ռեալ» մրցակցությունը, որը զուգահեռաբար ընթանալու է ամբողջ մրցաշրջանի ընթացքում, իսկ 2 անգամ` այս տարվա նոյեմբերի 28-ին ու 2011-ի ապրիլի 17-ին, «Ռեալն» ու «Բարսելոնան» կհանդիպեն դեմ առ դեմ, սկզբում` Կատալոնիայի մայրաքաղաքում, հետո` Իսպանիայի: «Բարսելոնայի» ու նրա մարզիչ Պեպ Գվարդիոլայի համար, ով ընդամենը 1 տարով երկարաձգեց իր պայմանագիրը թիմի հետ, խնդիրը կրկին նույնն է` հաղթել այն բոլոր մրցաշարերում, որին մասնակցում են: Իսկ ահա «Ռեալի» համար խնդիրը մի փոքր ավելի «պարզ» է` առաջ անցնել «Բարսելոնայից» կամ նույնն է թե` դառնալ աշխարհի ամենաուժեղ ակումբը: «Դժվար է հաղթել մի մրցաշարում, որտեղ հանդես է գալիս «Բարսելոնան»»- հայտարարել է մադրիդցիների գլխավոր մարզիչ Ժոզե Մոուրինյոն : «Բարսան» առայժմ մեկ մեծ տրանսֆեր է իրականացրել. թիմում հանդես է գալու Դավիդ Վիլյան: Իսկ թիմը լքել են Յա Յա Տուրեն («Մանչեսթեր Սիթի»), Տիերի Անրին («Ռեդ Բուլ», ԱՄՆ), Դմիտրի Չիգրինսկին («Շախտյոր»): «Ռեալն» էլ առայժմ 1 լուրջ ձեռքբերում ունի` ի դեմս արգենտինացի Անխել դի Մարիայի:Արդեն պարզ է թիմի վետերան Ռաուլի ապագան: Որոշ լրատվամիջոցներ Էլ Գուտիին արդեն ուղարկում են թուրքական «Բեշիկթաշ»: