 Այսօր մամուլի ասուլիսի ժամանակ Բարսելոնա ակումբի գլխավոր տնօրեն Ժոան Օլրվերը հայտարարեց, որ երեկ կատալոնյան ակումբը պաշտոնական առաջարկ է արել Արսենալին Ֆրանսեսկ Ֆաբրեգասի տրանսֆերի վերաբերյալ:
<<Բոլորին հայտնի է, որ Սեսկը ցանկանում է խաղալ մեր ակումբում, ինչպես նաև բոլորին հայտնի է, որ մենք ցանկանում ենք ձեռք բերել նրան: Սակայն այս գործում ևս մի կարևոր կողմ կա՝ Արսենալը: Ցանկացած գործարք, որը մենք ցանկանում ենք այս առումով կնքել, պետք է համաձայնեցվի այդ ակումբի հետ: Այդ պատճառով էլ երեկ՝ հունիսի 1-ին, տրանսֆերային պատուհանի բացման օրը, մենք լոնդոնյան ակումբին Սեսկ Ֆաբրեգասի տրանսֆերի վերաբերյալ գրավոր ձևով պաշտոնական առաջարկ ենք ուղարկել: Այժմ մենք նրանց պատասխանին ենք սպասում՝ հուսալով, որ բանակցությունները հաջող կընթանան, և արդյունքում մենք կգնենք ֆուտբոլիստին>>,- հայտարարել է Ժոան Օլիվերը:
Նրա խոսքերը շարունակել է ակումբի փոխնախագահ Ռաֆաել Յուստեն.<<Ես հույս ունեմ, որ ակումբին ինչքան հնարավոր է շուտ կհաջողվի կնքել Սեսկի ձեռքբերման պայմանագիրը: Ես լավատեսորեն եմ տրամադրված: Միանշանակ է, որ ակումբում գրկաբաց և ուրախությամբ ետ կընդունեն ֆուտբոլիստին և նրա ընտանիքին: Այդ պատճառով մենք ոչ մի ավելորդ քայլ չենք անի: Մենք սկսել ենք բանակցությունները, մենք հանգիստ ենք, բայց ոչ մի րոպե չենք դադարեցնի դրանց ընթացքը>>:
|
