Կատալոնական «Բարսելոնան» առաջարկել է Լոնդոնի «Արսենալին» ֆուտբոլիստների փոխանակում: Գաղտնիք չէ, որ «կապտանռնագույններն» ակտիվորեն հետաքրքրվում են անգլիական թիմի իսպանացի կիսապաշտպան Սեսկ Ֆաբրեգասի ծառայություններով: Երկար ժամանակ «Արսենալը» մերժում էր «Բարսային», և ահա կատալոնացիները նոր առաջարկ են պատրաստում. «Բարսելոնան» պատրաստ է փոխանակում իրականացնել. հարձակվող Զլատան Իբրահիմովիչն ուղևորվում է Լոնդոն, իսկ Ֆաբրեգասը վերադառնում է Կատալոնիա, տեղեկացնում է tribalfootball.com-ը: El Mundo Deportivo-ն նշում է, որ «Արսենալի» գլխավոր մարզիչ Արսեն Վենգերը կարող է դրական պատասխանել այդ առաջարկին: Գաղտնիք չէ, որ ֆրանսիացի մասնագետը դեռ տարիներ առաջ ցանկանում էր իր թիմում տեսնել այն ժամանակ երիտասարդ շվեդ ֆուտբոլիստին, սակայն Իբրան այլ տարբերակ նախընտրեց: «Բարսան» ցանկանում է այդ տրանսֆերն իրականացնել մինչև 2010թ. Աշխարհի Գավաթի մեկնարկը: